Salary

Çdo i punësuar ka të drejtë të kompensohet për punën e bërë. Paga paguhet në afatet e përcaktuara me Kontratë Kolektive, Aktin e Brendshëm të Punëdhënësit ose Kontratën e Punës, më së paku një (1) herë në muaj.

Për punën më të gjatë se orari i plotë i punës dhe/ose për punën gjatë ditëve të festave dhe për punën e natës, i punësuari ka të drejtë në pagë shtesë (llogaritet si përqindje e pagës bazë):

• 20 % në orë për kujdestari;
• 30 % në orë për punë gjatë natës;
• 30 % në orë për punë jashtë orarit;
• 50 % në orë për punë gjatë ditëve të festave; dhe
• 50 % përqind në orë për punë gjatë fundjavës.

*I punësuari mund të kërkojë që në vend të pagës shtesë, kompensimi t’i bëhet me ditë pushimi; kjo formë duhet të parashihet në Kontratën e Punës ose në Aktin e brendshëm të kompanisë.

Paga minimale përcaktohet në fund të çdo viti kalendarik nga Qeveria e Kosovës sipas propozimit të Këshillit Ekonomiko-Social.

Tutje, i punësuari ka të drejtë edhe për kompensim në raste të caktuara:

• Kompensimi i pushimit mjekësor:
  • Në rast të sëmundjes ka të drejtë në pushim mjekësor të rregullt, deri në njëzet (20) ditë pune brenda një (1) viti me kompensim prej 100 % të pagës.
  • Në rast të lëndimit ose sëmundjes profesionale në punë e cila ndërlidhet me kryerjen e punëve dhe të shërbimeve për punëdhënësin me kompensim prej 70 % të pagës së tij; prej dhjetë (10) deri në nëntëdhjetë (90) ditë pune
• Kompensimi i lëndimit në punë:
  • Në rast të lëndimeve dhe sëmundjeve profesionale që i merr i punësuari gjatë orarit të punës, punëdhënësi ka për detyrë t’ju ofrojë sigurimin për kompensimin e shpenzimeve.
• Mungesa në punë për shkak të pasigurisë dhe mbrojtjes së shëndetit:
  • Për shkak të pasigurisë dhe mbrojtjes së shëndetit në punë, me vendim të organit të autorizuar shtetëror ose organit të autorizuar të punëdhënësit, i punësuari ka të drejtën e mungesës me arsye nga puna; të njejtit i takon e drejta e kompensimit të pagës të cilën do ta kishte realizuar sikur të kishte punuar, por jo më gjatë se dyzetepesë (45) ditë në vitin kalendarik.
• Kompensimi i shpenzimeve për udhëtim zyrtar:
  • Në rastet e udhëtimit zyrtar jashtë vendit, i punësuari që udhëton ka të drejtë në kompensimin e shpenzimeve sipas kushteve, mënyrës dhe lartësisë së përcaktuar me Aktin e Brendshëm të Punëdhënësit.
• Kompensimi i dëmit:
  • Nëse i punësuari në punë ose lidhur me punën, me qëllim ose me pakujdesi të plotë i ka shkaktuar dëm punëdhënësit, ai është i obliguar ta kompensojë dëmin;
  • Nëse disa të punësuar, me dashje ose me paramendim i kanë shkaktuar dëme punëdhënësit, për dëmin e shkaktuar do të përgjigjen në mënyrë të barabartë;
  • I punësuari i cili në punë ose lidhur me punën, me qëllim ose nga pakujdesia e plotë i ka shkaktuar dëm personit të tretë, të cilin e ka kompensuar punëdhënësi, është i obliguar që punëdhënësit t’i kompensojë shumën e dëmit të paguar.

Kalkulatori i pagës